5歲港生揚威國際三大繪畫賽

年紀輕輕就為港爭光？黛安知道今年只得5歲、9月升讀小學嘅小妹妹鄔梓惠，早前畫咗3幅以關懷大自然做主題嘅畫，以最年輕參賽者身份，奪得3項國際獎項大獎，認真叻女呀！

其中一幅係梓惠畫自己踩住踏板車環遊世界，作品擊敗83個國家逾2.5萬個對手，喺第45屆捷克利迪策國際青少年及兒童視藝比賽中，獲最高榮譽嘅個人玫瑰金章大獎呀！另外兩幅就係畫瀕臨絕種動物「鶴鴕」同「親親小企鵝」，分別得到第19屆保加利亞國際兒童青少年繪畫比賽，同第26屆立陶苑「關心大自然」國際青少年及兒童繪畫比賽嘅個人大獎，好抵讚呀！

梓惠嘅繪畫導師劉生話，梓惠3歲幾開始學畫畫，可以用簡單、大膽筆觸捕捉人物、動物嘅表情，色彩活潑鮮明，畀到人純真感覺。今次嘅得獎作品將會喺世界各地巡迴展覽同印製成書宣傳關心生態。