Google增南大嶼街景 更新全港泳灘狀況

大嶼山係香港後花園，除咗天壇大佛同纜車，貝澳營地、石壁水塘、長沙泳灘都係黛安推薦嘅度假好去處。有好多人都因為怕去到鄉郊地方唔識路會走失，所以就唔敢去，好彩Google街景車舊年首次駛入南大嶼拍攝街景，有咗Google Map實景帶路，以後去南大嶼玩就唔使驚盪失路啦！

大嶼山對好多人嚟講始終都唔算近，新增南大嶼街景之後，無時間去咁遠嘅朋友，可以安坐家中透過Google街景一睹南大嶼古老鄉村嘅環境同村民生活，加深對本土文化同生態保育嘅認識。

Google街景仲更新咗全港多個泳灘嘅實景，包括水清沙幼嘅三星灣泳灘、港島熱門舂坎角泳灘等。喺30幾度高溫下想去沙灘消暑，都可以用Google Map輕鬆搵出建議交通工具同路綫啦！