【聲明】港生活網站並無進行電話推廣活動

縱橫遊搵項明生帶隊 10月飛釜山睇紅葉

發佈時間: 2017/08/02

雖然暑假尚未過去,不過一向鍾意旅行的黛安已經plan緊秋天外遊睇紅葉啦!咁啱昨日縱橫遊常務董事袁振寧(CN)邀請黛安食飯,近水樓台,當然不忘向佢攞料啦!

飯局上黛安遇見項明生(James),知道佢最近惹到一啲事非,大家都送上問候。James話多謝關心,但暫時唔方便講太多。作為相識多年的朋友,黛安希望佢可以安然度過。

言歸正傳,昨日黛安可真不枉此行,從CN和James身上攞到好多旅遊資訊。原來最近縱橫遊搵咗James做星級嚮導,於10月開辦兩團釜山賞楓團,除咗會去釜山十大勝景梵魚寺睇紅葉,仲會深入慶尚道及全羅道等地深度遊,兩處都唔算港人熱門旅遊景點,若要自由行,睇怕要花一番工夫做功課,好在有James呢位旅遊達人帶路,自然無有怕。睇番行程,James仲會帶大家四圍覓食,品嘗慶州傳統17道菜韓式定食、長腳蟹宴、鮑魚人蔘雞及1A級韓牛燒肉等,聽見都流口水!行程咁吸引,難怪即使5日團費索價$22,888都不乏捧場客。聽CN講,早前佢哋將宣傳資料放上facebook,第一團已火速爆滿;第二團亦僅餘約10個名額,想參加就要快啲報名!

12月開京都奈良團

另外佢哋亦預告12月會再合作帶團去日本京都及奈良。黛安記得James曾出書介紹呢兩個地方,可算係半個地膽,相信跟佢出發定有新發現。

CN提到近年多咗港人去日本,帶動生意增長,但面對廉航等競爭,要不斷推陳出新,如今年初公司搵咗杜如風合作,今次夥拍James,期望擦出火花。

撰文: 黛安 消息特靈八卦公關
欄名: 八卦名利場