【聲明】港生活網站並無進行電話推廣活動

海港城夢幻金字塔 噴出千萬個泡泡

發佈時間: 2017/08/03

黛安細細個最期待就係爸媽帶去公園吹泡泡,見到一個個「圓碌碌」嘅泡泡漂浮空中,就會覺得好靚、好夢幻,成日幻想如果被成千上萬嘅泡泡包圍就好啦!咁啱海港城邀請黛安出席「Bubble Up」公共藝術計劃開幕活動,即場噴出1,000萬個泡泡,黛安梗係要去感受下有幾夢幻啦!

海港城一向多搞作,今次就同日本藝術家大卷伸嗣合作,喺海港城海運大廈嘅露天廣場,設計咗個3米高、共6層嘅「泡泡金字塔」,入面仲收埋咗45部泡泡機,可以噴出超過1,000萬個泡泡。大會噚日趁住開幕禮「試噴」,現場立即被鋪天蓋地嘅泡泡包圍,黛安見到身邊漂浮住一大堆泡泡,真係少女心出晒嚟!

望見一大堆泡泡隨風漂浮,經過嘅大小朋友除咗影相之外,都忍唔住出手隔空「捉泡」玩𠻹!藝術家大卷伸嗣亦都話,希望透過呢個泡泡裝置,勾起大家都擁有嘅一啲美好童年回憶,黛安見到咁多人笑住玩泡泡,睇嚟效果都幾好喎!如果大家想一齊吹泡泡,仲可以向場內嘅義賣車買泡泡樽吹埋一份,收益會撥捐畀「思覺基金」做慈善用途。

撰文: 黛安 消息特靈八卦公關
欄名: 八卦名利場