7仔買卡樂B滿$30 加$10換限定杯緣子

卡樂B大家就食得多喇，卡樂B角色嘅杯緣子大家又有無見過呢？卡樂B今個夏天又有新搞作，將代表4款產品嘅經典角色，以沙灘玩樂造型變成杯緣子，黛安見到都畀佢哋萌親呀！只要喺7-Eleven買卡樂B產品滿$30，加$10就可以換到隨機一款杯緣子，仲要係香港獨家推出，相信又會喺一眾姊妹同小朋友之間掀起熱潮啦！

今次化身杯緣子嘅卡樂B角色，包括代表Jagabee嘅Potta、蝦條河童Ebi Kun、粟一燒嘅Corn Man、同埋薯片嘅Pote。佢哋一啲就喺沙灘玩，心心眼、傻更更嘅Potta就大派愛心，圓碌碌、得意搞笑嘅Pote仲會有超限量炫金色特別版！杯緣子由下周三起到9月5號都有得換購，快啲去將心愛嘅角色帶返屋企啦。