【聲明】港生活網站並無進行電話推廣活動

漂書節明開鑼 沈祖堯同你交換好書

發佈時間: 2017/08/04

古語有云︰「書中自有黃金屋」,好似大忙人微軟創辦人比爾蓋茲(Bill Gates),一年都至少睇50本書。黛安知道青年廣場明日和後日會舉辦漂書節,市民只要帶上自己最喜愛嘅書,就可以同其他人免費交換,包括「祖堯BB」中大校長沈祖堯3本珍藏好書。

公關姐妹透露,今年收集咗近萬本好書等大家嚟交換,市民最多可以帶上30本書,來到青年廣場兌換「換書劵」,喺現場慢慢揀番30本書返屋企。如果無帶書來又點好?唔緊要,只要like青年廣場嘅facebook,就可以兌換一張換書劵,免費帶走一本好書。今年連祖堯BB都參加埋一份,準備咗3本好書喺名人漂書區,包括《灌溉心靈的半杯水》、《筆遇》和《不一樣的天空》,只要經抽籤答中問題,就可以拎返屋企慢慢欣賞啦。

今年特別選擇於Y綜藝館舉行,所有書放晒喺座位上,大家一邊揀書之餘,仲可以欣賞音樂表演、名人分享等。暑假就唔怕悶啦!

撰文: 黛安 消息特靈八卦公關
欄名: 八卦名利場