【聲明】港生活網站並無進行電話推廣活動

昂坪鼓舞飛揚大滙演 視聽覺雙重享受

發佈時間: 2017/08/08

趁住暑假,一家大細去親近下大自然都係一個唔錯嘅選擇,黛安亦有個好去處推薦畀大家,就係昂坪360今夏特備節目「昂坪鼓舞飛揚大滙演」喇!黛安仲收到風,知道今次活動邀請咗激鼓樂社,表演中、日、韓、非等唔同風格嘅鼓樂,加埋氣勢十足嘅旗幟隨風飄揚,真係視覺同聽覺嘅雙重享受呀!

昂坪360市務總管陳衞良話,為迎接夏天嘅來臨,昂坪360喺今年暑假,特別安排咗充滿活力同開心氣氛嘅擊鼓表演,增添戶外活動嘅樂趣,畀大人同小朋友都可以過一個健康開心嘅暑假。

市民由即日起至今個月20號去到昂坪市集廣場,就可欣賞到每日3節、每節15分鐘嘅激鼓大滙演,表演開始時間分別係下午12點45分、2點半同埋4點鐘。

黛安提提大家,每場表演之後都會有「激鼓工作坊」,參加嘅市民可以學到打鼓嘅基本技巧,親身體驗鼓樂嘅樂趣,千祈唔好錯過呀!

撰文: 黛安 消息特靈八卦公關
欄名: 八卦名利場