沈祖堯夥方健儀 焗愛心月餅贈長者

估唔到人稱祖堯BB嘅中大校長沈祖堯教授除咗管理大學叻之外，連整月餅都有一手！佢最近同靚女校友方健儀一齊學整「中大愛心月餅」送畀獨居長者，仲拍片大講月餅製作過程，同埋分享對「寂寞」嘅睇法𠻹。真係超有愛心呀！

每賣1盒 捐出1個

今年已經係中大連續第三年推出「中大愛心月餅」，月餅由為精神病康復者同殘疾人士創造就業機會嘅社會企業「明愛天糧」烘焙，每賣出一盒，中大就送出一個月餅畀獨居長者，由師生校友組成嘅「中大•關懷」服務團下個月就會去探訪沙田同大埔區嘅長者，送上月餅㗎喇！而月餅嘅收益就會撥捐中大I•CARE博群計劃。

黛安睇完短片，覺得祖堯BB同健儀整月餅都幾熟手喎，唔知整出嚟好唔好食呢？祖堯BB就話，其實唔單止獨居長者會覺得寂寞，即使每天同屋企人見面、同枱食飯，但各自玩電話，都係會感到寂寞。佢鼓勵大家趁住中秋節同親友分享月餅，食嘅時候一齊傾下偈，擺脫寂寞。

各位姊妹可以上中大嘅facebook專頁睇祖堯BB整月餅同埋真情剖白。

至於有興趣訂購月餅嘅朋友，就可以瀏覽以下網址︰http://www.cpr.cuhk.edu.hk/mooncake/zh/