黛安
黛安

會展去年辦逾千活動 獲28獎項證書

發佈時間: 2017/08/09

會展去年辦逾千活動 獲28獎項證書

唔講唔覺,原來會展中心真係好犀利!你知道嗎?單係舊年,會展就舉行咗1,102場活動,好似特首選舉、神奇小子曹星如嘅拳擊賽事等,全部都係全城矚目嘅盛事。

黛安睇番資料,過千項活動中有116項係展覽,當中有涵蓋時裝、玩具、雲端科技、汽車、以至針對長者科技主題嘅新展覽,主題超廣泛。大家熟悉嘅展覽都唔少,好似巴塞爾藝術展、香港書展等,都有過百項。另外仲有一啲國際及本地會議、商務活動及宴會等,全年入場總人次有成570萬!

加上今年係回歸20周年,唔少慶祝活動好似文藝晚會、升旗儀式、煙花滙演晚宴都喺會展舉行。會展管理公司董事總經理Monica(梅李玉霞)話,佢哋唔單止提供場地,仲會提供保安風險評估、技術支援、人流同物流管理、餐飲服務等全方位活動體驗。活動舉辦得有聲有色,難怪為會展管理公司摘下「最佳國際會議展覽中心」、「卓越會議及展覽場地大獎」等28個獎項同證書啦!

撰文: 黛安 消息特靈八卦公關
欄名: 八卦名利場