邊度買孕婦裝？

孕肚一日比一日大，以前着開嘅衫都變得唔啱身，係時候買新衫。

懷孕初期，只要着鬆身少少嘅衫褲已能應付，連身裙、吊帶褲都係大肚婆嘅好拍檔，望落較年輕，唔會一副孕味甚濃嘅感覺。

其實一田等百貨公司都有孕婦裝專櫃，但選擇略少。對懷孕新手嚟講，最近水樓台買到現成孕婦裝嘅地方要數H&M，牛仔褲、西褲、休閒褲、連身裙、彈性T恤，一應俱全；褲款採用包肚設計，好舒服，雖然索價三、四百蚊一條，但勝在可以試啱先買，所以我第一批大肚衫都喺度入手。但留意，唔係間間H&M都有孕婦裝，要去到旺角家樂坊、九龍塘又一城呢啲大舖至有，詳情可問店員。

同身邊嘅孕媽媽傾開，大家置裝渠道都不外乎網購︰平日鍾意打扮及着裙嘅靚媽就推介到「Asos」買衫，貪佢款式多又時髦，仲經常打折；在職媽媽則鍾情英國品牌「Next」，仲有唔少大尺碼選擇；日本品牌「Nissen」品質亦唔錯，雖然佢關咗自家網店，但仍可在mydress.com買到佢嘅貨品；亦有媽咪讚「mothercare」嘅褲款質量好；當然亦有唔少人選擇淘寶，價錢平，換得密都唔肉赤。

除咗上述店舖，Audrey幫襯得最多係一家叫「愛戀小媽咪」嘅台灣網店，個人認為質量同價錢都比淘寶優勝。佢每隔幾日就搞推廣，近日為例，legging、短褲由100蚊台幣（約20幾蚊港元）起，我仲買過幾條連身裙和褲（介乎70-150港元），質料透氣有彈性，寄香港每公斤（3-4件衫）運費約20幾蚊，兩日就收到，推介！

（本欄逢周一、四刊登）