黛安
黛安

潮江春歎檳城炒蟹 甘香中帶辣

發佈時間: 2017/08/10

潮江春歎檳城炒蟹 甘香中帶辣

無論工作再忙,食餐好總能讓人叉足電。此刻黛安最懷念新加坡Long Beach嘅黑胡椒蟹,雖然短期內都不會去星洲,好在前排美心公關話畀黛安聽,佢哋今年又請咗曾喺Long Beach做咗廿幾年嘅星洲名廚張偉忠師傅嚟香港做客席大廚,將舊年好評如潮嘅「星潮尋味」系列載譽歸來。除咗有新加坡國菜黑胡椒蟹,今次仲有用上馬拉獨有甘香醬烹調嘅檳城甘香炒蟹,唔使出埠都歎到南洋名菜,令人食指大動。

今次呢個系列,推出咗唔少款新菜。新推嘅甘香炒蟹,與黑胡椒蟹一樣,用上蟹蚶大大隻嘅斯里蘭卡野生肉蟹,啖啖肉,配埋甘香醬嗰種辣得來勁具鮮香嘅滋味,令黛安好似返咗新加坡咁!另外用白胡椒調味嘅潮州式肉骨茶,就同平時飲開嘅藥材味肉骨茶差別好大,肉湯特別清甜。一問先知,原來師傅堅持用馬拉砂勞越白胡椒入饌,真係不惜工本。另一道「檸檬啦啦汁蒸刀貝」,黛安亦印象深刻,好味唔在講,個名都好特別。等張師傅出廚房即捉住佢問,原來「啦啦」係貝類咁解,真係食餐飯都長知識。

聽公關姐妹講,美心皇宮同翠園另推出「食在老廣州」菜式,有古法脆皮糯米雞、玉簪桂魚卷呢啲心機菜,睇來黛安呢個夏天想減肥都難了。

撰文: 黛安 消息特靈八卦公關
欄名: 八卦名利場