謝安琪入股生煎王取經

自從女兒張靖出世後，謝安琪（Kay）把全副心機投放在家庭上，她昨日現身銅鑼灣出席「上海生煎王」分店開幕，原來她也有入股蕭潤邦（Oscar）這間人氣食店。Kay不諱言有興趣開舖，希望趁機會偷師學做生意。

蕭潤邦與四位股東早前在大埔開分店，短短兩個月內再擴充，今次選址銅鑼灣，Kay更以股東身份負責剪綵，她說︰「其實大埔分店已經開始入股，我同Oscar識了好多年，我第一次出show佢已經到場支持，當時我心諗︰『唔通佢睇中我？哈哈！』之後我哋成日互發短訊鼓勵對方，依家一齊做生意，我會拜佢做大佬。」

產後的Kay除了專心照顧家庭，還計劃轉戰商界，她希望開一間生活雜貨小店，售賣有機產品。由於與飲食有關，於是入股「生煎王」偷師。問她是否捨不得離開女兒去工作？Kay坦言現時很享受湊女，加上BB這個時期最好玩、最得意，她笑稱︰「我發覺佢係一位行為藝術家，平日最鍾意喺我張床上碌來碌去，留低口水漬。至於個仔（張瞻）大喇，識得自己去踢波，有自己的社交圈子。」

Oscar 貼女友海報造勢

老闆Oscar與女友江若琳（Elanne）一早在場招呼賓客，銅鑼灣分店舖位最大，亦最貴租，Oscar透露新店投資了七位數字，自從他與Elanne拍拖後連開兩分店，她似乎很「旺夫」，Oscar聞言笑稱最緊要是身邊有個支持他的女人，做甚麼也會更起勁。Elanne即將舉行演唱會，Oscar已準備把女友的演唱會海報貼滿當眼位置，認真廿四孝男友！不過，Elanne開騷不會考慮搵男友上台，她說︰「我好容易被感動，佢有乜嘢都係返到後台先講啦。」

採訪︰Pauline

編輯：陳禮恒

設計：梁政敏