【聲明】港生活網站並無進行電話推廣活動

林鄭變小粉絲 與歌神校長玩自拍

發佈時間: 2017/08/14

歌神許冠傑同樂壇校長譚詠麟嘅「世紀合體」演唱會前晚正式開鑼,兩位喺舞台上又跳又唱,真係好young!而捧場客都好有分量,包括特首林鄭月娥,林太前晚都有喺facebook上載同兩位巨星嘅合照。

呢排林太都成日睇演唱會,上個禮拜先在旅發局電競音樂節睇完韓星,前晚又去咗支持阿Sam和阿Tam,仲話有機會喺紅館欣賞二人開騷,心情好興奮,喺演唱會上亦聽到好多熟悉嘅廣東歌。

提到佢近年重聽最多嘅歌,林太就話係阿Sam同哥哥張國榮嘅《沉默是金》咁話,仲附上歌詞:「是非有公理,慎言莫冒犯別人,遇上冷風雨休太認真,自信滿心裏,休理會諷刺與質問,笑罵由人,灑脫地做人。」似係想憑歌寄意咁喎。

黛安仲留意到,上次林太上次同韓星合照,最終有3,200幾人畀表情符號,今次同校長與歌神自拍反應更熱烈,未夠24小時已經有逾4,600人畀反應,比上一次更多人讚呢!

撰文: 黛安 消息特靈八卦公關
欄名: 八卦名利場