楊偉雄着圍裙現身 推廣香港創科

其實香港一向都有唔少創科人才，創新及科技局局長楊偉雄都抓緊每個機會做「宣傳大使」，噚日佢同傳媒茶敘，黛安見佢喺影相時間即刻「變身」，以圍裙look示人，唔通佢想做埋環境局嗰份，宣傳惜食？佢笑笑口話，其實條圍裙都係本地創科產品，係六廠基金會同香港紡織及成衣研發中心（HKRITA）合作，為荃灣香車街街市檔販度身訂做嘅圍裙。圍裙使用HKRITA特別研發嘅布料，有防水、防油、防污和防菌功能，而且只要曬到陽光或燈光，就可分解污漬，有「自潔」功能。

對於唔少人都關注Uber叫車違法嘅問題，楊偉雄就話，其實本地都有好多優秀嘅創科項目，應該扶持多啲，又好自豪咁話，最近吸引到數一數二嘅專業投資公司紅杉資本來港成立「香港X」科技創業平台，從大學入面揀選有潛力嘅項目，幫佢哋推出市場，至今已收到500個項目報名，「香港X」對當中逾100個都有興趣，首批投資嘅6間公司，主要都係deep science innovation，而唔單單係一個商業經營（business model innovation）咁話。