英超開鑼，紅魔衝冠有望！

最受香港球迷歡迎的「英超」正式揭開戰幔，大家當然坐定定捧場，尤其是曼聯今季在摩連奴領軍下，有機會問鼎聯賽冠軍，這並非紅魔迷主觀臆測，而是摩帥過去執教其他球隊的慣例，從車仔到皇馬到國米，通通有迹可尋！

上屆冠軍車路士今季落筆打三更，主場居然輸給般尼2比3，從皇馬加盟的莫拉達雖射入1球，但絕對比不上盧卡古在曼聯的風光。車仔今年不斷賣球員，尤其是放走中場馬迪到曼聯，被全世界鬧到暈，最危機的當然是領隊干地，估計玩不到季尾就執包袱！

曼聯的幾大對手日子都不好過，曼城幾經辛苦才在下半場70分鐘入波，但領隊哥迪奧拿肯定有兩度功夫，除阿古路之外，今季絕對要防那位「耶穌」加比爾捷西斯，入球能力超高！阿仙奴戲劇性反勝李斯特城4比3，是執番身彩！但雲加今年留住山齊士，又不必打歐聯，我認為他們的聯賽成績一定能重返前四！至於利物浦，巴塞挖角失敗，雖留住射手古天奴的人，卻未必留得住他的心，據說此子已開始「玩嘢」，稱病缺陣頭幾場，咁球迷認為，利記還有睇頭嗎？至於熱刺，我認為不會有上季那麼勇猛了！

還是祝賀一下曼聯，第一戰大勝4比0，前綫有兩pair黑風雙煞，即是普巴、拉舒福特，馬迪爾和新來的盧卡古，絕對衝冠有望！

（本欄逢周二、四刊登）