【聲明】港生活網站並無進行電話推廣活動

曹星如爭22連勝 練到想嘔

發佈時間: 2017/08/16

「神奇小子」曹星如(Rex)10月將會對戰前世界拳王河野公平,賽事都講咗好幾個月,門票噚日終於公開發售,售票系統一開閘即刻塞晒車!Rex噚日就同河野一齊西裝骨骨咁出席主辦單位DEF Promotions搞嘅賽事發布會,雙方將會大戰12回合,河野仲好有信心咁話,要喺9個回合之內K.O.對方!好大口氣!

DEF Promotions總監阿Jay(劉志遠)話,今次比賽嘅合約有特別嘅條款,講明若果Rex不幸落敗,佢有權喺半年內優先提出重賽,爭取重奪佢嘅WBO超蠅量級國際金腰帶。今年3月擊敗向井寬史之後,受傷嘅Rex休息咗幾個月先重投訓練。雖然佢嘅傷已經好轉,但依家每個星期都仲會周身痛1、2日,佢仲大爆自己最近練到想嘔,心痛死一班粉絲!

河野讚Rex速度體能佳

Rex笑住咁話,外號「Tough Boy」嘅河野係前世界冠軍,有多次打世界冠軍比賽嘅經驗,係個好好嘅對手。今次比賽係好難得嘅機會,好值得佢去享受,所以佢訓練時都好努力,希望體能上可以做到最好。河野亦大讚Rex速度同體能好,不過依然好有信心咁話要喺9回合內K.O.佢。

撰文: 黛安 消息特靈八卦公關
欄名: 八卦名利場