美食博覽今開鑼 激抵$0.5超級優惠

一年一度的美食博覽今日開鑼，參展商各出奇謀推出吸睛商品或超抵優惠。每年都成為全場亮點之一的$1優惠，今年繼續鬥個難分難解，不過原來$1未算最抵，今年竟然仲有$0.5的超級優惠，認真誇張。

最平$0.5歎花膠

只要成為每日首10個客人，就可以$0.5歎到原隻涼拌花膠。分量一點不欺場，30幾頭的鱸魚花膠用雞湯浸過夜再攤凍，食時再灑點蒜、芝麻、蘋果醋等，膠質重又夠入味。遲了到場都可以$40食到，價錢可接受。另外每日頭30個客人更可歎到即炒黑松露炒蛋！

味高美：尊貴美食區3B-D23、公眾館3E-E09

平食西班牙火腿

在美食博覽內想找點下酒物？推介你這碟16個月的西班牙白毛豬火腿，只需$10就有一小碟，味道鹹香，油香十足，買來送酒或過口癮都一流。

Diverxu Limited︰尊貴美食區3B-D07

真．鮑魚撈麵

這份$48的鮑魚撈麵絕對不是只得鮑魚麵同鮑汁，真的有2隻鮑魚！使用安記的即食紅燒鮑魚，每隻都有約乒乓球size，煮得夠腍夠入味，汁底都有來頭。因為今次安記同鼎爺crossover，用來撈鮑魚麵的汁更是由鼎爺秘製，鮮味十足。

安記︰公眾館1C-B10

札幌名物布丁燒

由自家製焦糖漿、雞蛋布丁同乳酪輕芝士蛋糕組成的札幌名物布丁燒在香港好少見，今次由山下菓子推出並且能在美食博覽食到。一次過食齊滑溜布甸同輕盈的芝士蛋糕兩種質感，不止有原味同抹茶味兩款選擇，最吸引是會印上Sanrio卡通圖案，每日限量400杯，粉絲必搶。

Kidulteam Limited︰尊貴美食區3B-F03

$1盒低糖蛋黃奶黃月餅

美食博覽年年都可找到不少月餅推廣，好似本土品牌2/3 DOLCI今年就推出$1盒月餅。只要成為首日首50位顧客，即可以$1買到8件裝的低糖蛋黃奶黃月餅一盒，正價要成$388一盒，慳好多！

2/3 DOLCI：公眾館3E-C05

第28屆美食博覽

日期︰公眾館由即日至8月21日、尊貴美食區由即日至8月20日

時間︰10am-10pm（公眾館8月21日10am-6pm）

地點︰灣仔港灣道1號香港會議展覽中心

編輯：余敏

設計：K