迪士尼周六推拍攝優惠 邀小公主參與巡遊

自從香港迪士尼推出咗全球獨家嘅攝影服務「迪士尼處處拍」之後，黛安聽到唔少用過嘅朋友都讚好，仲大曬樂園攝影師幫佢哋影嘅靚相𠻹。今個星期六，樂園會推出首個以「小公主夢想無限」為主題嘅「迪士尼處處拍日」，各位可以帶埋小朋友同各位迪士尼公主瘋狂合照！

樂園嘅公關姊妹話，當日入園嘅朋友首先可以見到睡公主，佢朝早會喺美國小鎮大街主持樂園開放儀式。之後睡公主、白雪公主、灰姑娘同貝兒會喺城堡前同大家見面，仲會送限量簽名收藏卡。樂園仲會邀請30個着住公主衫嘅小朋友，戴住公主頭冠，參加下晝嘅「小公主出巡」。我諗各位港爸港媽應該發夢都無諗過自己屋企嘅小公主可以參加迪士尼嘅巡遊！

免費下載數碼相

當日用「迪士尼處處拍」仲有優惠。只要拎住3張由處處拍攝影師喺樂園唔同指定地方影嘅相，就可免費下載一張連限定相框嘅數碼相，價值$68㗎！買5張8R數碼打印照片，仲可獲贈價值$398嘅「迪士尼處處拍+」一張，畀大家下載當日所有相𠻹！大家同4位公主合照再買埋「迪士尼處處拍+」，以專用app下載合照，仲可欣賞新出嘅「小公主夢想無限動態相框」𠻹。