曼聯U16球員訪港交流 學包餃子

黛安身邊唔少朋友、同事都係足球迷，佢哋好留意自己心愛球隊嘅動向，好似本身係曼聯擁躉嘅老友就話，曼聯U16青年隊一班成員今個禮拜一（14日）就首次嚟咗香港交流，參加馬會與曼聯及香港足球總會合辦嘅「賽馬會青少年足球精英匯」。

黛安問番馬會公關姊妹，佢話今次「賽馬會青少年足球精英匯」係馬會首次主辦，曼聯青訓學院一行25名16歲或以下青年球員，喺14號至20號為期一星期嘅足球與文化交流活動中，分別同香港U17青年隊及地區精英隊成員切磋互動，雙方除咗聯合訓練同兩場足球友誼比賽外，仲會參與中式廚藝及舞獅文化交流等活動𠻹。噚日曼聯U16青年隊朝早喺賽馬會傑志中心操練後，一眾球員同香港U17青年隊成員就齊齊學包餃子，從中了解中國飲食文化。今日佢哋會同香港地區精英隊成員，跟隨前世界武術冠軍周定宇學詠春和舞獅技巧，夜晚就會坐山頂纜車，欣賞香港嘅夜景，節目非常豐富。