黛安
黛安

e世代品牌大獎 電盈 華碩 惠普 成大贏家

發佈時間: 2017/08/22

e世代品牌大獎 電盈 華碩 惠普 成大贏家

由《e-zone》主辦嘅「e世代品牌大獎」係香港規模最大、至具代表性嘅IT界盛事之一,所以每年嘅頒獎禮,黛安都特別留意邊個獲獎。

新一屆頒獎禮上星期五圓滿結束,今年大會以「智能網絡創新生活」為題,於4個組別(PC、Digi、eLife及Corp四大產品方案)共頒發76個獎項,其中有3位行業翹楚,更奪得主題「IT傑出人士」(IT Excellence)大獎,恭喜晒咁多位得獎者!

講到今年嘅大贏家,不得不提電訊盈科集團,旗下多個品牌合共取得9個獎項,可謂大豐收!華碩(ASUS)亦非常厲害,佢哋一共捧走咗7個獎項;此外惠普(HP)亦奪得4個獎項。至於今屆「e世代至尊電腦品牌大獎」,則由聯想(Lenovo)繼續蟬聯。

增設社交網絡獎項

當天《晴報》及《香港經濟日報》社長麥華章亦係頒獎嘉賓之一,佢提到《e-zone》多年來不斷為讀者打造資訊最豐富嘅平台,無論綫上、綫下都滿足到讀者嘅需要;未來,智能網絡世界及社交平台發展更趨成熟,所以今年e世代品牌大獎亦增設多個社交網絡及網上手機裝置獎項,投票反應仲非常熱烈。而《e-zone》總編輯林燦輝亦謂,頒獎禮一年比一年成功,希望透過今次選舉,吸引更多年輕人及專才投身業界,出一分力。

撰文: 黛安 消息特靈八卦公關
欄名: 八卦名利場