【聲明】港生活網站並無進行電話推廣活動

加入惡人行列 萬聖節玩轉迪士尼

發佈時間: 2017/08/29

如果你嘅內心入面都住咗一個放肆、惡搞嘅自己,無地方釋放出嚟,今個萬聖節就一定要去香港迪士尼玩下喇。事關迪士尼樂園今年萬聖節誠邀各位大人小朋友一齊加入惡人行列,同黑巫婆、鐵鈎船長等奸角反轉樂園,全年只此一次咋!

黛安昨日上咗《晴報》,遇到迪士尼樂園嘅朋友帶埋《愛麗斯夢遊仙境》嘅瘋帽子嚟搵《晴報》同埋《經濟日報》集團嘅同事,一齊玩遊戲仲大派禮物同門票,邀請我哋參與由9月14號去到10月31號,一眾惡人喺樂園日夜連場嘅派對!迪士尼朋友下午會換上鬼馬萬聖節裝束,坐住南瓜車喺大街上出巡、同大家互動;到咗夜晚,經典奸角如邪惡皇后、《小魚仙》入面嘅烏蘇拉就會傾巢而出,巡遊狂歡!

經典奸角齊齊參與大巡遊

活動當然唔少得最受歡迎嘅鬼屋啦,今次鬼屋以實驗室夢境迷宮做主題,沿途會經過《怪獸公司》、《木偶奇遇記》、《愛麗斯夢遊仙境》嘅詭異場景。《加勒比海盜》入面嘅半人半鬼海盜仲會喺探險世界入面尋找積克船長嘅行蹤,各位如果遇到佢哋就要小心喇!

撰文: 黛安 消息特靈八卦公關
欄名: 八卦名利場