HKU SPACE 60載 校友見證光輝歲月

「活到老學到老」喺瞬息萬變的今日尤其重要，推廣持續教育的香港大學專業進修學院（HKU SPACE）今年已經成立60周年，校友逾百萬，可謂桃李滿門，學院為此推出新書《活學空間60載—HKU SPACE校友的見證》，搵咗60位師生同校友，分享喺學院的經歷點樣改變佢哋的人生軌迹。黛安亦參加咗新書發布會，榮休院長楊健明講起學院嘅威水史，原來唔少科目例如法律、中醫等，都係由學院率先開辦，之後再被引入本地其他大學。

學院多年來孕育咗唔少知名人士，曾被《透視雜誌》選為「亞洲四十驕子」之一嘅80後設計師羅曉騰（Ken）都有到場分享，原來佢係名校中學出身，但想考大學設計系，結果考咗3次都失敗，喺朋友介紹之下報讀SPACE嘅視覺傳意系，以第一名成績畢業，畢業嗰年仲獲香港設計師協會頒發「設計學生年獎」金獎！佢話，年輕人成長時有啲迷失，「好彩有啲有心人創辦課程，一班熱血嘅年輕人先有機會。」