Audrey Ng
Audrey Ng

幾時先有胎動?

發佈時間: 2017/09/04

「阿B,點解你咁耐都未踢我㗎?」明明聽醫生講,懷孕第18-22周左近,媽媽開始會感受到胎動。我由第18周開始期待,點知等呀等,去到第22周都仲未有動靜,內心焦急不已。

終於等到產檢嘅日子,我追問醫生,我嘅情況係咪正常。佢幫我照完超聲波,同我講BB情況良好,又安慰我懷第一胎嘅媽咪,未必對胎動嘅感覺太敏感,叫我再等下,過多一排都無反應再去搵佢。

可能因為太在意,我開始有啲唔舒服。「老公,我呢排腸胃好似蠕動多咗。」「肯定係你太緊張阿B無踢你啦!」我同自己講要放鬆心情,但腸胃蠕動嘅情況未有遠離我;而我開始發現,嗰種感覺唔係不適,反而似有條小金魚喺肚裏面游水。後來我終於搞清楚,呢種感覺就係我一直期待嘅胎動了!

「媽媽真係遲鈍,依家先知道係你。」初期嘅胎動感覺唔算明顯,頻率都唔密,但卻係母嬰之間一種奇妙嘅牽絆,感覺親密。有時當我專心做嘢,BB腳仔一伸,就好似想引你注目一樣,而我則會用手搓搓肚皮,向佢回應︰「媽媽喺度呀。」甜蜜又溫馨。

有啲朋友話,每朝起身係胎動最厲害嘅時刻,而我嘅BB似乎係隻貓頭鷹,往往喺我瞓覺時先郁;去到中後孕期仲愈踢愈起勁,搞到我無覺好瞓。不過都好,起碼你郁下,媽媽就知道你健康。姑娘話,如果BB半日無動靜,就要開始記錄胎動次數,若果兩個鐘頭郁唔夠十下,就要向醫護人員求助了。

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路