誠哥設$500萬獎學金 懷緬故友沈弼

滙豐銀行前主席沈弼勳爵前兩個月（7月2日）離世，享年90歲。呢位前大班係上世紀70、80年代金融界嘅風雲人物，仲同唔少本地富商交情深厚，黛安知道，人稱「超人」嘅長和系主席李嘉誠就係其中之一。

誠哥噚日透過李嘉誠基金會公布，為咗紀念呢位對香港貢獻良多嘅生平友好，特別撥出港幣500萬元，設立「李嘉誠基金會沈弼勳爵紀念獎學基金」，獎助成績優異嘅香港DSE學生，未來十年，按年甄選出2至3位獎學金得主，負笈英國兩間指定大學修讀學士課程。

黛安聽講，誠哥緬懷故人時提到，香港今日能發展成國際金融中心，沈弼勳爵功不可沒。當年位居要津嘅佢，多次喺英國為港發聲，亦支持香港商界發展機遇，所以希望藉着呢筆獎學基金懷緬摯友，紀念佢喺港、英兩地嘅卓越成就。

轉讓九倉 收購和黃

黛安睇番資料，原來誠哥同沈弼早喺上世紀70年代就結緣。當年誠哥手持20％九倉股份，成為單一最大股東，沈弼建議誠哥放棄收購，並轉讓股份畀船王包玉剛，促成包玉剛入主九倉。

之後，沈弼將滙豐持有、並準備轉售嘅和記黃埔股權，以低於帳面值嘅每股7.1元，喺無公開招標情況下轉售畀長實，滙豐仲提供貸款融資，幫長實完成交易，令誠哥成為首名控制和記黃埔嘅華人。誠哥依家透過成立獎學金緬懷故友，呢份心意確實難能可貴。