Audrey Ng
Audrey Ng

大肚婆怕飲糖水?

發佈時間: 2017/09/11

「你體重超咗啲,出去約個期返嚟『飲糖水』啦。」咩話?聽到護士咁講,我個心簡直晴天霹靂。

「飲糖水」呢三個字,凡係大肚婆聽到都聞風喪膽。佢係一項產前測試,睇下你有無患上妊娠糖尿。有人覺得驚,原因係江湖傳聞杯糖水極度難飲;而Audrey之所以怕,則因為我寧舍為食,好驚驗到有問題,要按「糖尿餐單」嚴控飲食,日日篤手指監控血糖,於我而言簡直慘過苦行。

目前公立醫院只會為高危一族(即高齡、有家族病史、曾經生過超重BB或者本身超重等孕婦),喺懷孕24-28周期間「飲糖水」。雖然我唔想面對,但若果有妊娠糖尿又控制得唔好,可能會令胎兒過大、加大分娩難度,亦會增加畸胎、早產等風險,BB長大後亦較易患糖尿及心血管病。為咗小心駛得萬年船,我只好硬着頭皮赴約。

測試前一晚12點,我就要開始禁食,第二朝一早空住個肚去健康院報到。檢驗過程好簡單,到埗後姑娘會先幫你抽血,然後叫你喺10分鐘內飲完一杯超甜嘅糖水(有茶餐廳凍飲咁大杯,甜到乸喉),飲完坐低等兩個鐘,再抽一支血,咁就走得。

唔知係咪一時間吸收太多糖份,我喺等候期間覺得好暈,難怪姑娘唔准我哋中途離開健康院;另外我聽過有媽媽話接受唔到糖水嘅味道,等候期間嘔晒出嚟,前功盡廢,估計要約期重做。

同其他公院嘅檢查一樣,若果驗到你有問題,姑娘會打電話畀你跟進,否則你係唔會接到電話。好彩,呢關我亦大步檻過。

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路