$10萬團費 跟杜如風海陸空遊東京

提起杜如風（Helen），大家都會諗起日本，事實上係日本食玩買專家嘅佢，明年農曆大年初一將會同縱橫遊嘅團友去東京，除咗入住間間過千呎嘅豪華套房，仲會坐直升機、坐遊艇同豪華專車等睇靚景、食好嘢、買靚嘢同去箱根浸溫泉等，6日5夜行程團費盛惠10萬元或以上，真係豪爆呀！

黛安噚日同縱橫遊行政總裁袁振寧（CN）食飯，Helen亦在場分享佢遊日樂事；期間Helen提到下月首播由佢演出嘅《九州攻略》節目，去到一處叫天草嘅地方，令佢好驚喜。「當時坐船出到海中間，有20-30條海豚圍住，嗌到我想即刻跳落海，可惜無泳衣咋。」講番明年大年初一由Helen帶隊嘅超豪團，CN話團費暫定6位數，名額16個，相信係歷來最貴嘅日本旅行團，雖未正式接受報名，但已接獲查詢十幾人想報名，令佢非常鼓舞。