【聲明】港生活網站並無進行電話推廣活動

大肚婆的美容禁忌

發佈時間: 2017/09/18

「你啲皮膚差咗喎,我有張免費coupon,你拎去做facial啦。」「好喎,多謝晒!」諗都無諗就拎咗張coupon走,行到半路先識得問︰「哎呀,大肚可唔可以做facial㗎?」

懷孕期間因為荷爾蒙改變,部分媽咪可能感覺皮膚轉差,暗瘡又多咗,想做啲嘢補救。根據懷孕網站專家所講,大肚婆照常洗面、敷mask其實無問題,但有幾點需特別留意︰

一、怕敏感忌磨皮:懷孕時皮膚特別敏感,簡單磨砂去角質層ok,但磨皮就唔好啦!化粧護膚亦要揀成分天然嘅產品。

二、跳過電流療法:去美容院的話,美容師一般會建議孕媽咪跳過同電流有關嘅步驟,亦好少畀佢哋「做機」。就算我之前只係揀普通嘅面部護理療程,美容師幫我針清黑頭後,都無用電流棒消炎,改用消炎水,以免電流影響BB。當然彩光、激光等療程,更加唔建議喺懷孕期間進行。

三、香薰油要慎選:腰痠背痛想做個Spa鬆弛?記住避免使用薰衣草及迷迭香等香薰精油,尤其懷孕唔夠三個月嘅媽媽。多年前消委會曾引述香薰治療學會資料,指呢啲精油有好強嘅通經特性,最嚴重可導致流產;而丁香、百里香及薑味嘅精油,則較易引起皮膚敏感。

四、體溫高易流產:大肚時千祈唔好焗桑拿,亦唔建議做body wrap,研究指體溫過高會增加早孕期小產機會,亦有機會導致後孕嘅媽咪早產,大家要留意呀!

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路