薛家燕在無綫喜劇《燦爛的外母》與飾演其女婿的黎諾懿大放笑彈，演活麻麻煩煩的外母。現實中，她的愛兒石耀庭（Jackson）將於明年結婚，家燕姐「升呢」做奶奶。兩年無拍劇的她，坦言拍攝新作得着甚多，尤其是學習兩代人相處之道，為娶新抱做好準備。
今次家燕姐為劇集做了不少預備工夫，包括近70套鮮色又搶眼的服裝，並配合不同款式的眼鏡，務求化身燦爛的外母，令電視機前的師奶觀眾有親切感。劇情圍繞兩代關係，無巧不成話，家燕姐亦快將面對婆媳相處，皆因其二子Jackson在她穿針引綫下，於今年四月求婚成功，明年六月做老襯。《燦爛的外母》開播前，Jackson在FB分享劇集宣傳片，為母親落力宣傳。對於可有叫囝囝煲劇偷師，家燕姐直言︰「Jackson搞婚事都好忙，之前去英國、意大利影婚照；我教個仔做好老公，要有責任感、愛錫老婆及家庭，互相溝通、諒解！」
希望2019年抱孫
現年67歲的家燕姐自覺年紀漸長，體力難以負荷，故已開始減產拍劇，她直言下一齣劇最快也要等到2019年，不過，明年中娶新抱，家燕姐亦視之為人生「大Project」，除了在愛兒婚前一個月不接Job幫手籌備婚禮外，更希望擺足100圍、豪花七位數字大排筵席。「我book了洲際酒店，可惜場地所限擺唔到100圍，依家預計58圍，所以頭痛緊怎樣寫賓客名單。」
對於準新抱Zoe，家燕姐除了大讚對方又靚又有禮貌，亦語重心長送上入門貼士。她說︰「做了我新抱就成為公眾人物，要習慣隨時畀人偷影，社交帳戶亦要小心處理！」又表示拍攝《燦》期間獲益良多，可以乘機實習與新抱和睦相處之道。「劇中我是保守外母，經常和女婿黎諾懿爆衝突，兩代人各有想法，後期慢慢磨合帶出倫理關係。現實中，明年我就做奶奶，一定唔會好似劇中King姨（家燕姐的角色）咁激，凡事包拗頸！」她又熱切期待囝囝婚後盡快「造人」︰「我都希望19年有孫抱！」
唔敢向女兒催婚
至於兩位千金，33歲大女祐珊及29歲三女耀珠亦已屆適婚年齡，家燕姐戲言等做「燦爛的外母」等到頸都長，但亦會接受現實。「兩個女都話未拍拖，因為香港男仔少，話等耀庭結婚先，我都唔畀太多壓力！」對於大女珊珊與緋聞男友王梓軒（Jonathan），家燕姐就話兩人不過電︰「Jonathan唔錯，係好男仔，不過最緊要二人有愛情，珊珊淨係話遇到啱就會講我知！」不過，她也拿自己的經驗作教材，認為感情事無得急。「當年媽咪都成日催婚，但我都到34歲才結婚！」至於細女，現時在港大修讀碩士課程，近期每晚做project至深夜，家燕姐笑言如果她跟男同學一齊做功課，亦屬好事，可見這位媽媽絕對給予囡囡很大的戀愛自由。
撰文︰Steven
攝影︰Benny
編輯︰黃寶恩
設計︰K
欄名: 人物專題