袁詠儀自薦做城城B女契媽

郭富城的太太方媛在今個月初順利誕下B女，身為城城好友的袁詠儀（靚靚）立即「投訴」最近的聚會，對方都玩失蹤，不過她表示完全明白，更直言恨做城城的小公主契媽。

袁詠儀、蘇永康及張玉珊等昨日出席慈善基金會活動，席上與長者玩遊戲派禮物，預早歡度中秋佳節。容光煥發的靚靚笑言由自己化粧，老公張智霖（Chilam）都有讚她靚，問到Chilam是否習慣每日都會讚她？靚靚說︰「兩父子成日夾埋恰我，不過有時又好搞笑。」

談到好友郭富城榮升做爸爸，靚靚爆原來早在B女出世不久，城城已主動報喜，可是她至今仍未有機會探望B女，靚靚說︰「等BB大個啲先探佢，我唔敢買衫仔呀，驚大得快會唔啱着，所以打算同成班朋友打塊金牌畀B女。」靚靚謂以往城城還是單身時，經常約大夥兒食火鍋，做了爸爸後幾乎絕迹所有聚會。問到恨生女的靚靚會否想做契媽？她坦言B女有父母的優良基因，做契媽求之不得。

蘇永康丟低兒子歐遊

另外，蘇永康自從囝囝Jazz出世後，即將首次丟低兒子與太太歐遊一星期，問到會否趁機造人？蘇永康笑言一定不會，而且他的舅仔最近生了個女，B女與Jazz的年齡相近，彼此有個伴就夠了，他更笑言視B女如己出。提到最近重播《壹號皇庭》，康仔表示為此更一口氣追番前幾集，累得雙目無神，笑言出街要戴太陽眼鏡遮黑眼圈。

採訪︰Pauline

編輯：林梓添

設計：梁政敏