黛安
黛安

40位魔術師大滙演 變戲法 曬唱功

發佈時間: 2017/10/04

40位魔術師大滙演 變戲法 曬唱功

少林功夫加唱歌大家就見過,但魔術加唱歌你又睇過未呢?香港嘅大型魔術活動唔多,黛安身邊唔少鍾情魔術嘅朋友都苦無表演或欣賞機會,好在超級魔幻杯今個月將會捲土重來,有超過40位魔術師參與,仲帶嚟好多創新嘅活動𠻹。眾多活動中,黛安覺得最過癮嘅莫過於首屆國際魔術師歌唱大賽!

同融樹頭創意藝術文化基金一齊主辦今次活動嘅魔術師何煒麟(Keanu)話,魔術師向來都好有表演慾,有一次佢同其他魔術師一齊去唱K,玩玩下咁就話:「不如搞個魔術唱歌比賽」,點知個個都大力讚好,於是就促成咗呢個「以歌伴魔術」嘅比賽嘞!比賽吸引咗日韓台、馬來西亞同本地嘅熱愛音樂嘅魔術師參與,佢形容唔少選手嘅歌喉「超乎想像咁好」𠻹,令黛安超期待!

同場加映道具展銷

除咗各項魔術比賽同大滙演之外,現場仲會有汽球講座、展覽、同埋國際魔術道具展銷,唔少本地同海外道具創作人會親自喺現場同大家講解佢哋嘅創作,就算本身唔識魔術都可以買嚟表演畀朋友睇,一嘗做魔術師嘅滋味!去唔到現場但又想一展身手嘅朋友,仲可以參加網上魔術短片拍攝大賽,下星期一就截止報名,快啲搵埋班朋友一齊拍片參加啦!

撰文: 黛安 消息特靈八卦公關
欄名: 八卦名利場