入媽媽會 護協掃平貨

眾所周知，做護士其中一個好處，就係可以去護協福利中心掃平貨。不過有討論區嘅媽咪教路，就算你唔係護士，只要持有「惠氏媽媽會」或「雀巢營養天地」會員卡，一樣都可以喺佐敦白加士街護協一樓嘅「親子天地」掃平貨㗎！

Audrey聽見呢個着數情報，當然第一時間入會啦！兩張會員證嘅申請方法都好簡單，喺網頁填妥資料，並且上載預產期醫生紙就申請到，之後會有職員打電話畀你核實資料。Audrey大約喺申請兩星期後收到惠氏會員卡（連一小疊coupon），而雀巢張卡亦喺三星期內收到。

如是者，我拎住張卡去到護協探個究竟，果然真係用到護協價買嘢！現場除咗有得賣BB床、床上用品、奶泵等耐用品，更加係尿片、奶樽、棉花球、沐浴及清潔用品嘅集中地，不過地方就唔算好大，星期六去仲幾多人，大肚媽媽要小心碰撞。

根據討論區媽媽嘅情報，SoftTouch棉花球係必買產品，250粒裝只賣$19（街價約$26-30）。Audrey自己就買咗幾隻Pigeon嘅PPSU奶樽，記得百貨公司賣$76一個，呢度$61就買到，變相打8折；Tommee Tippee暖奶器都抵買，今年BB展特價都賣緊$230，護協$195就有交易；紅外綫耳溫計平日動輒$400-$500一部，呢度亦有Omron出品嘅平價選擇，約售$250。

之不過咁，如果同Aeon、一田嘅嬰幼兒用品展比較，好多消耗品（如尿片、濕紙巾、奶樽、清潔液及沐浴用品等）價錢都同護協不相伯仲，買夠一定價錢又可以送貨，唔使自己搬餐懵，仲方便。

（本欄逢周一刊登）