劉青雲唔睇自己舊作

劉青雲昨日以宣傳大使身份出席NowTV節目巡禮，與太太郭藹明（Amy）同是愛睇戲的他，就連喜歡的片種也一樣，不過青雲表示現階段冇時間翻看自己的舊作。

劉青雲多來年拍戲無數，不過他表示每逢睇戲只會抱觀眾心態，從來不會邊睇邊想自己如何演繹戲中角色，事關睇戲應該是開心和享受。被問到有哪套劇最鍾意「翻煲」？青雲表示當年做電視台時，在凌晨兩、三點返到屋企，也習慣撳錄影機，裏面有甚麼戲就睇甚麼，睇到自己瞓着為止。他笑言︰「我記得多數係睇《教父》同《的士司機》，睇咗好多次，多到識背。」

那他又會否翻看自己的作品？青雲直言甚少翻睇。「依家唔會睇，等我退休住老人院，無嘢做嘅時候睇，到時會更加客觀同清晰去睇自己做成點樣。」平日在家中他和太太郭藹明都很享受睇戲的時光，因為大家口味差不多，英雄片、愛情片都會睇。

上網睇戲大勢所趨

談到新一代觀眾多數只是上網睇電影或劇集，令到免費電視台更難做，青雲表示︰「咁都無辦法，社會不斷進步，大家都適應，其實呢樣嘢都好影響電影票房，不過呢個係大勢所趨。」青雲坦言本身不喜歡用手機睇戲，始終熒幕太細，他還是覺得大銀幕睇戲才夠震撼。

採訪︰Pauline

編輯︰林梓添

設計︰梁政敏