煤氣烹飪中心課程 米芝蓮大廚教煮法式大餐

香港人出名為食同嘴刁，黛安有唔少姊妹因「為食」而練得一手好廚藝。最近黛安收到風，由煤氣烹飪中心同法國廚師協會合辦，有米芝蓮大廚任教嘅「法國烹飪藝術文憑課程」準備招生啦，課程踏入第9屆，以往已培育出70位專業廚藝高手！而為咗搞搞新意思，煤氣烹飪中心決定開辦全新法式糕餅烹飪課程，各位「甜品控」要留意啦！

全新嘅法國糕餅烹飪藝術文憑課程，將由法國廚師會導師Matthieu Godard執教。呢位法籍大廚擁有超過17年職業廚師經驗。Matthieu話，呢個課程將會由麵糰製作、烘焙技術及擺盤藝術開始教，務求令學員掌握法式甜品嘅基本製作技巧，佢又期望學員用想像力將食譜變化，喺畢業時可創造屬於自己嘅食譜。

至於深受煮食愛好者歡迎嘅法國菜烹調課程今年繼續開班，由課程總監Vincent Leroux親自執教。Vincent話，烹飪強調基本功，所以課程初期會主力教食材知識、執刀姿勢、廚藝詞彙等。佢又同黛安分享，呢個課程入面嘅所有食材都係由法國直送，而學員完成課程並通過考試後，仲可獲法國教育部頒發嘅「法國廚藝訓練第五級證書」，資歷相等於法國執業廚師！不過，課程學費都有番咁上下分量，分別為15.3萬同19.8萬。但唔使飛去法國都學識煮正宗法國菜，梗係物有所值！