【聲明】港生活網站並無進行電話推廣活動

玩轉韓流嘉年華 掃$1688滑雪團套票

發佈時間: 2017/11/01

寒流未到,但韓流先到!黛安平時都好鍾意望住靚仔歐巴滋養心靈,仲成日搜索有無平機票返韓國同歐巴「團聚」。呢排黛安收到風,上年好受歡迎的「魅力韓流冬旅嘉年華」,今個禮拜六、日(4至5日)會喺鑽石山荷里活廣場載譽歸來!既然是由韓國觀光公社及文化體育觀光部主辦,優惠梗係多籮籮,當日會有10幾間旅行社,喺現場發售超筍韓國滑雪旅行套票,5天滑雪團最平$1,688起,3日自由行套票更平到只需$1,288起!各位姊妹想返「家鄉」話都無咁易。

公關姐妹話,幫襯咗旅遊套票仲有機會獲贈特別版T-money交通卡同行李電子秤,而且場內仲有韓服體驗攤位,畀大家着靚靚做打卡,仲有攝影師幫手影番輯韓風相!

適逢明年2月南韓平昌會舉行冬季奧運,大會特登整咗個「平昌計時器挑戰遊戲」畀大家玩,只要將計時器停得愈近舉辦日期,就會有獎品。嘉年華期間拎住遊戲卡,去各個攤位收印章及完成指定任務,仲可以參加大抽獎,除咗有得抽韓國旅遊禮券,仲有機會攞到免費韓國來回機票呀!

講起韓流,自然唔少得歌舞助興。大會今年請咗熱爆男團組合B1A4來港獻唱,連佢哋師弟ONF都齊齊訪港!另外,人氣B-Boy組合Drifterz仲會駐場兩日表演勁舞,仲可以同佢哋合照,真係心花放。

撰文: 黛安 消息特靈八卦公關
欄名: 八卦名利場