中銀紀念鈔慈善珍藏版 專家教路揀「靚冧把」

中銀噚日公布中銀香港百年華誕紀念鈔票認購結果，唔知大家有無抽到呢？但唔好唔記得仲有388套慈善珍藏版等緊大家去bid呀，8號就截止申請呀！黛安同香港真藏（荃灣）負責人、收藏家張頌昇（Anthony）傾開，佢話自己都會加入競投，仲醒咗啲貼示畀黛安！

Anthony話，慈善珍藏版要揀公認嘅「靚冧把」、好意頭，例如好多8字嘅組合，但就唔好揀5同7既搭配，中國人未必太鍾意呢啲數字。有多啲本錢嘅朋友就可考慮揀「6條」，例如6個1、6個2等，都係非常受歡迎，咁多個冧把最靚嘅就莫過於888888喇，相信都會係最值錢，估計最少去到六位數字！

佢估計，30連張未必咁受歡迎，因30連張面額大又好大幅，要裱起先靚、唔裱起又睇唔到，送禮都較少送30連張，大家要考慮埋呢個因素喇！