林欣彤 跳出框框做多棲藝人

發佈時間: 2017/11/02

林欣彤 跳出框框做多棲藝人

「小巨肺」林欣彤(Mag)與前輩韋綺姍在《老表,畢業喇!》中頻頻曬靚聲,令人聽出耳油。Mag在劇中清唱一曲《花花宇宙》而成為BabyJohn的「天籟之聲」,並展開了校園愛情故事。現實中,Mag加盟王祖藍的手工藝創作公司後,除了拍劇,早前又首次參演舞台劇,不斷作新嘗試,驚喜不斷。

林欣彤在劇中飾演的程舒,既有做老師教育莘莘學子的夢想,亦擁有一把靚聲,角色「入屋」,令觀眾受落。初次拍長劇的Mag指︰「So far覺得自己handle到,當你好投入、好enjoy一件事,其實好多嘢都唔覺得難。係成班演員給我的力量,諗到大家一齊做嘢,我就有動力返去開工,仲覺得自己好好彩,遇到好多很好的前輩,肯教我,令我個心定啲。」

感激祖藍信任

拍劇以外,大家更關注Mag的音樂路。加盟王祖藍的工作室已一段時間,她指︰「其實模式好唔同,以前有經理人公司,又有唱片公司,佢哋會有個plan畀我,例如一年出一隻碟。祖藍的公司係無的,但我好感激,無論有咩想做,只要解釋畀佢聽,都會放手畀我去做,好感激他的一份信任。」

Mag早前推出新歌《奇怪》,不論曲風及MV風格都大變,問是否想轉歌路,她解釋︰「我無set死自己的曲風,那陣子有甚麼想表達、想講甚麼message,我就會用曲風去表達。音樂的領域太闊,好多嘢好好玩,我想試下自己的可能性,唔會框死自己。」她又表示願意接受各種新嘗試,但一定是唱歌優先。而此刻的最大心願,是開一場有誠意的個人演唱會︰「唔一定要(規模)最大,地點唔係最緊要,但我想做一個有感動或者治癒能力的演唱會給大家。」

粉絲不離不棄

出道七年,起跌難免,Mag指最難捱是12年因聲帶問題帶來的沮喪日子︰「連講嘢都講唔到,所以當有番把聲時,我真係好珍惜,亦都好感恩。」在那段艱難時期,Mag幸得一班不離不棄的粉絲支持,令她感激不已︰「當我出返嚟唱歌,支持我的歌迷仲喺度,他們真的無條件等我,默默地等待同支持我,所以我覺得最無以為報是這班fans,我會繼續做好自己的崗位,報答他們的支持。」

髮型︰Terry@ Hair Corner

服裝︰rococo

場地︰峰景餐廳

撰文︰何美澄

攝影︰林良明

編輯︰黃寶恩

設計︰梁政敏

欄名: 人物專題