帶基層玩Spartan障礙賽 港大生學識有承擔

相信好多人都知做運動會釋放胺多酚，可以對抗負面情緒。港大馬禮遜堂明日就會有20位大學生一對一帶領20位低收入家庭嘅中學生，參加Spartan障礙賽，一齊Figthing！

帶起呢股運動熱潮嘅係香港大學馬禮遜堂高級導師梁俊偉（David），佢話馬禮遜堂每年都會舉辦不同主題活動，今年就以運動做主打，舉辦YES（Youth Enrichment by Sports），300位來自五湖四海嘅大學生、研究生等，由年頭開始，齊齊約埋做HIIT運動，反應非常好。David見到大家玩得咁開心，就諗不如畀更多人可以join，於是聯絡咗社福機構，畀機會班大學生可以一對一教下來自低收入家庭嘅中學生一齊做運動，操Fit自己。佢仲讚港大中醫學士5年級生陳冠龍同學好幫得手，好多工作都由佢籌組，亦好開心獲得港大馬禮遜堂宿舍舍監鄧智偉教授支持。

佢話低收入家庭嘅學生，平時其實無咩機會可以去參加大型戶外活動，擴闊視野，「有錢都寧願拎來做書薄費」，所以決定由班哥哥姐姐帶住一起去參加Spartan障礙賽，「畀班大學生知道要對社會多一份承擔感」。經過一輪訓練後，兩班人已經好friend，David話︰「日後弟弟妹妹們對讀書、工作有咩問題，都可以請教呢班哥哥姐姐。」

而今次係佢哋第一次參加，主辦單位Spartan仲贊助呢班中學生。無論結果係贏定輸，黛安都覺得佢地已經贏咗。