無止橋慈善基金10周年晚宴 沈祖堯黃錦星合唱籌百萬

今年係「無止橋慈善基金」成立10周年，過去10年已發動超過3,200位大學生同義工，完成超過60個項目，甚具意義。早前更舉行咗10周年晚宴，不少高官、校長都齊齊出席支持，包括環境局局長黃錦星、保安局局長李家超同7間大學校長，仲籌得逾百萬元善款！

作為無止橋榮譽顧問嘅黃錦星，佢話10幾年來一直好支持無止橋喺內地農村推動可持續發展、提倡環保理念，佢當晚仲大開金口，同各來賓一齊全場合唱《朋友》。

而第3次參加無止橋活動嘅中大校長沈祖堯就講笑話，記得第一次去到農村好唔習慣，因食飯係用好似洗面咁大嘅盆、去廁所又會畀好多雞鴨望住，但就好享受同學生喺農村服務同傾計，臨走時村民仲好感動咁話︰「建的是一座橋，留下的是一份情。」令沈校長畢生難忘。