【聲明】港生活網站並無進行電話推廣活動

「海運觀點」睇黃昏美景 兼歎滋味秋蟹盛宴

發佈時間: 2017/11/06

「建行(亞洲)香港美酒佳餚巡禮」啱啱過咗,不過踏入11月,試食活動仍然停不了。黛安都一連趕咗幾場。好似上個禮拜五旅發局企業事務總經理梁美寶(Cynthia)同海港城高級經理楊浩章(Andrew)就聯手「請客」,精選16間海港城餐廳,在最新開放嘅「海運觀點」舉辦「Wine & Dine Feast」秋蟹配氣泡酒季節限定盛宴試菜活動。

喺睇住270度靚海景嘅觀景台食飯本來已夠晒浪漫,再配合埋斜陽輕拂海面,盪出閃閃鱗光,嗒住氣泡酒享受黃昏愜意涼風,同旅發局、海港城高層一齊談天說地,黛安未試完主菜,都醉咗差唔多六、七成,真正「酒不醉人人自醉」。

黛安係「蟹精」,好多公關姐妹都知,今次試菜最激中味蕾同心窩嘅,首推Paper Moon Hong Kong嘅「皇帝蟹肉牛油果西西里大蝦沙律」。咪睇沙律簡簡單單,最考功夫嘅係取材﹗原來隻咁肥美嘅皇帝蟹,係來自南極海域,西西里紅蝦都係專登喺-50度以下嘅海域捕捉,一上水即刻急凍keep住肉質鮮美,果然啖啖新鮮啖啖肉。

英國名廚Jamie Oliver旗下嘅Jamie's Italian,大廚馬小明炮製嘅「意式海鮮雜燴」,有齊皇帝蟹、青口、蜆等港人最愛海鮮,仲貼心將蟹肉起出配搭法包,一塊已滿足味蕾對「蟹」嘅追求。

天穴特製嘅「毛蟹味噌薄脆」就用脆脆米餅配上味噌烹調嘅蟹肉蟹膏,夾埋知名調酒師Dorothy Lam調配,糅合梅酒同香檳滋味嘅日本雞尾酒「梅季緣」,真係Perfect Match。

撰文: 黛安 消息特靈八卦公關
欄名: 八卦名利場