社創基金資助 港青年創新短片齊支持

時下嘅年輕人多才多藝，上網睇下佢哋拍嘅短片就知，唔少網紅嘅片，黛安都好鍾意睇。好才華當然要好好善用啦，扶貧委員會轄下嘅社創基金就非常識貨喇，佢哋同香港青年協會合作，搵咗10隊後生仔，資助佢哋幫10個獲社創基金資助嘅創新項目拍片，再放上網幫呢啲項目宣傳。

黛安最近喺網上見到佢哋製作嘅短片，原來每個隊伍可得到最多3萬蚊資助。而喺10隊拍攝隊伍入面，好多隊嘅來頭都好厲害，好似為「共享廚房」拍片嘅Hexa6on同埋為Alchemist-社會創新工業拍片嘅一筒，就曾獲浸大電影學院種子計劃嘅獎項；為「好『修』成綜合維修服務」拍片嘅黑柴製作，舊年仲拎到台灣屏東國際旅遊電影節最佳剪接獎！

呢10條片已經陸續喺社創基金同青協M21 YouTube頻道、仲有myTVsuper頻道播放中，各位朋友都不妨留意下！