黛安
黛安

太古「港樂•星夜•交響曲」 港天才音樂家 演奏悠揚樂韻

發佈時間: 2017/11/13

太古「港樂•星夜•交響曲」 港天才音樂家 演奏悠揚樂韻

剛過去嘅周末,黛安應太古Cindy同Lydia邀請,參加一年一度嘅太古「港樂.星夜.交響曲」,喺中環海濱聽古典音樂,兼賞維港美景,過咗個令人陶醉嘅晚上。

太古自2006年起已經係港樂嘅首席贊助,合共贊助超過2億元。今年嘅活動就由港樂首席客席指揮余隆執棒,仲有Harry哥哥主持大局,帶起全場氣氛。

而最令黛安印象深刻,就係包括由管弦樂團演奏28歲本地作曲家陳啟揚嘅作品《欲明》,同埋即場演出嘅14歲鋼琴家李仲欣(Johnson Li)及12歲小提琴家蘇千尋(Paloma So)。當晚嘅演奏令人聽出耳油,Johnson原來師承本地著名鋼琴家黃懿倫,果然名師出高徒。

講開聖誕節去邊玩,Johnson就話未來一個月嘅schedule排滿晒,要去好多個國家表演,認真人氣逼人!

未來3年繼續贊助

而當晚黛安遇上好多好姐妹,好似有旅發局嘅Becky Ip、Cynthia、Amy同Kenneth Wong,仲有工銀亞洲嘅Angela、富臨門嘅Janet、太古James同Arnold、貿發局嘅Margaret Tong同一班傳媒朋友。適逢兩位11月壽星女Cynthia和Janet生日,我哋仲即場幫佢哋唱生日歌慶祝。

雖然當晚唔係夜空無雲,但幾萬人可以放低手頭上嘅工作,聚埋一齊聽古典音樂洗滌心靈,實在難得。太古仲宣布,會繼續贊助港樂多3年至2020年,總共達4,640萬,每年11月大家都有得免費聽音樂!音樂會隨住柴可夫斯基1812序曲同音樂煙火滙演結束閉幕,明年再見啦!

撰文: 黛安 消息特靈八卦公關
欄名: 八卦名利場