【聲明】港生活網站並無進行電話推廣活動

全天候共享工作間 太古blueprint 最啱創業

發佈時間: 2017/11/14

黛安噚日先多謝完太古Cindy同Lydia邀請,上周六去咗太古「港樂.星夜.交響曲」音樂會享受古典樂韻,話咁快又係太古地產event撞到Cindy,當然要親身再多謝佢啦。與此同時,黛安把握機會同太古地產行政總裁白德利(Guy Bradley)交流下,原來近年太古地產成績好好,尤其係內地項目,包括成都遠洋太古里同上海興業太古匯。Guy話,國內中產階級增多,消費能力愈來愈高,令中國項目表現都水漲船高。

香港太古廣場項目都好成功,今年第三季營業額表現非常理想!Guy仲介紹咗太古地產多位高層同傳媒朋友見面,順道參觀佢哋喺太古坊新開嘅共享工作間「blueprint」。聽太古地產姐妹May、Wagne和Maria講,blueprint開咗1個月已有75%出租率,成績不錯。原來要租blueprint都唔貴,個人用家只需畀4,500蚊就可以做1個月會員,至於5個人至25個人嘅小公司,就可以租用private room,不過費用就有啲唔同,最低3萬蚊起。所有用家可免費用會議室、影視室、party room、淋浴間,仲有露天吧枱,設施24小時開放,適合不同行業嘅需求。黛安實在非常佩服太古地產嘅管理層,跟上共享經濟呢個新潮流、新市場,而且大受歡迎,證明佢地的確眼光獨到!

撰文: 黛安 消息特靈八卦公關
欄名: 八卦名利場