飛行旅途購物兼煲劇 國泰加推高速Wi-Fi

相信唔少朋友搭飛機嘅時候，都試過唔知點樣打發旅途當中嘅時間，其實黛安成日都好想喺機上上網煲劇同睇新聞，可惜又唔係間間航空公司都有Wi-Fi。噚日黛安就聽到個好消息，國泰航空喺明年年中開始，會喺波音777客機同埋A330空中巴士上面提供高速Wi-Fi！

公關姊妹噚日同黛安分享呢個喜訊，國泰航空顧客及商務總裁盧家培話，乘客對機艙網絡服務嘅需求日益殷切，公司都好明白喺飛行途中能夠保持聯繫，對乘客係好重要嘅。喺不久將來，當安全帶指示燈熄咗之後，大家就可以喺3萬5千呎高空上寫意漫遊網絡世界！到時乘客可以用手提電腦、平板電腦、智能電話，透過高速服務喺旅途中check email、上網、網上購物，甚至打卡都得啦！

依家國泰已經喺空中巴士A350-900客機成功引入機艙寬頻網絡，盧家培仲預計去到2020年，佢哋所有廣體客機都會設置無綫網絡，黛安真係好期待呢一日呀！