【聲明】港生活網站並無進行電話推廣活動

聖誕ifc玩太空嘉年華 K11睇童心藝術裝置

發佈時間: 2017/11/17

雖然仲有成個月先到聖誕,但各大商場已如箭在弦,布置好迎接這個消費黃金檔期,最近見到啲聖誕裝飾都出籠,好有普天同慶feel,黛安都急不及待要去影靚相!

每年必去打卡嘅中環ifc商場,今年就以太空做主題,搞咗個「Christmas in Space」嘅太空嘉年華,有聖誕飛船、太空嘉年華基地、Christmas Station聖誕指揮站等,帶大家返去50至60年代過一個非一般嘅Christmas啊!上得太空點可以唔影相留念,登上「Your Face in Space太空攝影艙」就可影動畫短片,如果捐出50蚊仲可以換領2個印有自己個樣嘅肖像襟章,所有收益會捐畀香港救助兒童會!

做完太空人都唔夠喉?咁可以去埋尖沙咀K11,同著名法國當代藝術家Nicolas Buffe和本地藝術組合Stickyline,合力打造嘅《THE UNIVERSE IN ME︰A CHRISTMAS VOYAGE》聖誕藝術展覽。呢度充滿童心同以星座傳奇布置,由Nicolas創作嘅15呎高藝術裝置《火箭燈籠》,非常吸引眼球。聽公關姐妹講,裝置嘅主體結構係日本椴木同落葉松木製成,再由日本匠人喺東京以傳統入榫工藝組合而成,作品得天獨厚,一定要打卡啦!姐妹話,只要下載AR手機App,就可以同裝置互動,欣賞由Nicolas設計嘅以13個星座展開嘅宇宙旅程。

睇完裝飾,當然要準備聖誕禮物。公關姐妹就話畀黛安知,誠品即日起至下個月25號推出聖誕禮品展,超過2,800樣聖誕禮物等你買,由平到貴都有齊,仲特別揀咗一啲100蚊以內嘅產品,啱晒交換禮物!即日起至明年1月2號,只要係生活消費品買滿1,500蚊,就可以帶走台灣誠品生活獨家設計嘅馴鹿桌上夜燈!好靚啊!

撰文: 黛安 消息特靈八卦公關
欄名: 八卦名利場