【聲明】港生活網站並無進行電話推廣活動

「世界夢號」首航 歎露天按摩池 賞無敵日落美景

發佈時間: 2017/11/20

黛安上星期五應好姐妹Christine Li邀請,見證雲頂郵輪集團嘅新船「世界夢號」首航,仲係第一艘喺香港命名嘅郵輪,真係機會難得!

「世界夢號」係「雲頂夢號」嘅姐妹船,同樣以香港作為母港,郵輪甲板高達18層,超過70%房間都有私人露台,畀大家吹住海風睇靚景。黛安一向都好鍾意坐郵輪遊歷世界,今年中就曾經坐過「雲頂夢號」玩咗3、2日,坐新船嘅感覺果然唔同啲,服務和設施都係一流。

今次首航係喺香港海上度過周末假期,有3,000幾人同船。之後行程會由香港去廣州南沙,之後再去菲律賓馬尼拉,展開6日5夜海上之旅。

難得上到船,當然要打卡!黛安即刻去船上嘅酒吧,前主播、葡萄酒達人黃大鈞幫手介紹咗Penfolds St Henri 2013,口感柔滑濃郁,果然好飲。船上有齊香檳、紅酒、威士忌,啱晒唔同人。同場嘅旅發局好姐妹Cynthia、Jane同Lucinda當然唔放過機會,一齊請教黃大鈞點揀紅酒。

之後,黛安走上第17層嘅船頭去找方健儀,Akina帶我參觀呢艘郵輪僅得2間嘅總統套房,喺17層船頭左、右各1間,有私人露天甲板同露天按摩池,望住個海睇無敵嘅日出日落嘅自然美景,簡直係人生樂事!跟住又遇到《晴報》社長麥華章、世界自愈力及念力研究院(WISH)院長趙婉君、《晴報》專欄作家查小欣同旅遊達人項明生。大家相約幾時一齊出海,試下呢艘新船。

撰文: 黛安 消息特靈八卦公關
欄名: 八卦名利場