黛安
黛安

空中之城聖誕喜飛 海港城亮燈傳歡樂

發佈時間: 2017/11/21

空中之城聖誕喜飛 海港城亮燈傳歡樂

呢幾日天氣開始凍,愈來愈有聖誕feel。海港城噚日就舉行聖誕亮燈儀式,黛安都有去現場打卡,亮燈一刻全場一齊大叫「Merry Christmas!」,簡直好似到咗聖誕一樣咁有氣氛!

每年海港城嘅燈飾都係城中話題,相當矚目,今年就以「傳遞快樂‧聖誕喜飛」做主題,海運大廈露天廣場化身成「空中之城」,成個夢幻星空一樣,黛安率先去到巨型聖誕飛船打卡,公關姐妹話,呢艘飛船高逾7米、長20米,前後都有螺旋槳形嘅走馬燈不斷轉動,仲加咗超過2,000個LED燈,閃閃發光好精美。

現場仲有LED小提琴演奏同Hoop呼拉圈舞蹈表演,唔少市民同旅客都特登到場見證亮燈儀式,小朋友就玩得最興奮。

講到最驚喜,一定係天王劉德華做亮燈儀式嘉賓,佢單手插住褲袋,慢慢行落嚟出場,真係非常有型。

九龍倉置業執行董事凌緣庭話,今年希望營造聖誕老人喺空中準備派禮物嘅畫面,所以現場都有唔少肥嘟嘟嘅聖誕老人裝置!佢仲話,海港城近年較少設計機動裝置,但今年特意喺飛船裝置上加插轉動機關,務求為市民帶嚟一種活潑、歡樂嘅氣氛!

另一聖誕新年倒數熱點銅鑼灣時代廣場,今年就有史諾比陪大家過聖誕。公關姐妹話,史諾比係勇往直前嘅夢想家,傳達永不言敗嘅人生觀,所以希望帶畀大家一個充滿夢想、勇氣同幸福嘅聖誕,一齊迎接2018年!展覽期由即日起至12月26號,黛安今晚都會去懷緬下童年,你都一齊嚟啦!

撰文: 黛安 消息特靈八卦公關
欄名: 八卦名利場