黃錦星教行山 注重安全兼要愛惜

近期天氣清涼，最啱就係行山郊遊嘞。最近黛安睇咗由馬會出版嘅《駿步人生》，今期佢哋同環境局局長黃錦星做咗個專訪，局長係「山友」，話自己行山興趣同佢自細居住地方有段淵源，仲提醒我哋行山要小心！

局長講到，佢細個住喺慈雲山屋邨，邨後嘅郊野公園係香港第一代嘅郊野公園，佢可以用最低消費享受大自然美景，會考嗰陣佢會帶書去後山溫書，study leave嗰陣仲同同學去行啱啱開嘅麥理浩徑！

黛安發現身邊都多咗好多朋友鍾意行山，原來局長都留意到呢個潮流！佢話而家多咗人鍾意行山，但就輕視行山嘅風險，呼籲大家要有責任、有計劃，睇地圖，做好行山安全規劃，唔好令我哋嘅紀律部隊疲於奔命。

黃局長仲提醒大家自己垃圾要自己帶走，少啲用即棄物品，一定要懂得愛惜大自然。作為環境局局長，果然要做最佳榜樣！