【聲明】港生活網站並無進行電話推廣活動

15米巨型Google Map Pin 去海港城打卡做善事

發佈時間: 2017/12/01

黛安平時去旅行,要揾路最鍾意用Google map呢個偉大發明。今日喺海港城「海運觀點」觀景台,就見到一個15米高嘅巨型Google Map Pin,隔住個維港都睇到,同當年海港城對出的黃鴨一樣咁醒目吸睛。原來呢個Pin有特別意義,係為「奧比斯」籌款,只要嚟到打卡,就可以幫到患有眼疾嘅人,又有靚相,又做善事,一舉兩得!

公關姐妹話,好多藝術家都曾喺唔同國家及地區,好似台灣、德國、愛沙尼亞等,以Google Map Pin做概念,創作出立體藝術裝置,今次海港城就將手機嘅地圖導航地標座無限放大,希望可以為患有眼疾嘅人籌款,只要由今日起至26號,嚟觀景台打卡,將影有巨型Google Map Pin或觀景台嘅相,喺自己嘅fb或ig upload同#harbourcity和#hcview,經驗證後,海港城就會捐出10蚊畀奧比斯。

仲唔止啊,姐妹話,活動期間都會推出「慈善襟章」義賣,大家只要去到「海運觀點」換領處捐款,就可以換領1個襟章,不限捐款數額,多多益善,少少無拘。而每換領1個襟章,海港城就會同時額外捐出10蚊。每個襟章都會印有唔同嘅形容詞或者語句,好似#夕陽無限好、#日落西山下、#黃昏點唱機、#Amazing及#Romantic等等,留個紀念都唔錯啊。

黛安知道,活動期間所有收益都會全數捐畀奧比斯。黛安決定周末就去打卡,做善事齊齊出力!

撰文: 黛安 消息特靈八卦公關
欄名: 八卦名利場