無綫台慶劇《誇世代》播映至今，主要靠「福將」歐陽震華（Bobby）與陳豪、張繼聰的搞笑鐵三角帶起話題，足證「福將」的金漆招牌未被歲月磨蝕。Bobby拍足半年，經歷寒冬與炎夏，更差點中暑暈倒，確實為無綫50歲生日搏到盡，可幸拍檔許紹雄、田蕊妮及吳業坤等老中青演員全屬「好腳」，齊齊以笑聲打造這齣跨越世代之作。
貫徹一年一劇的宗旨，Bobby從15年的《東坡家事》、16年的《一屋老友記》到現正熱播的長劇《誇世代》，每次劇集的口碑、收視皆有保證，「福將」未有失手。繼86年的《黃金十年》後，57歲的Bobby挑戰體能極限再拍長劇。「當年《黃金十年》拍60集，今次雖然50集，但要由二月尾拍到七月，橫跨半年㗎。」
撑起50集唔病得
拍攝期間，Bobby更險些暈倒。「整齣劇我要連戲着冷衫，六月時有一天烈日當空12點拍外景，忽然發覺自己啲毛孔開晒，冷衫又黐肉難以散熱，自己知道唔掂，所以即刻嗌停要回家休息，中暑真係會死人！嗰日休息夠了，夜晚再去開廠！」
由於劇中角色宋仲基貫串整個故事，Bobby亦明白要身先士卒做好榜樣，盡量向冧廠說「不」。他稱︰「我拍足半年，全日沒通告的日子只得兩、三日，有時外景緊接廠景等同一日做兩日工作，我逼自己唔病得，幸好今次甚少動作場面，而最過癮係有John哥（姜大衛）、許紹雄等高手，田蕊妮、陳豪等亦是好拍檔，開工時氣氛勁好，我哋經常笑到收唔到聲！」
捧坤哥做接班人
今次他難得與兩位新一代小生張繼聰、吳業坤過招，身為TVB享負盛名的搞笑高手，Bobby亦樂見長江後浪推前浪，睇好二人接班。「阿聰跳得、唱得又寫到歌，演戲亦算全面；坤哥工作態度好好，今次佢可以在咁多粒星身上學嘢，上位唔出奇，希望他生生性性唔好咁百厭！」他更盛讚在劇中與他互換身體的坤哥有自己的影子，既牙擦擦又玩得，有如看到「那些年」的青春歲月。
《誇世代》播得如火如荼，卻面對另一齣大堆頭台慶劇《溏心風暴3》的狙擊，但Bobby相信遇強愈強。「《溏心3》是講傳統家族爭產，我哋就咩都一味夠誇，有輕鬆又有復仇，而且良性競爭是好事，我都好期待《溏心3》。」曾有份打造《陀槍師姐》系列、《壹號皇庭》系列等經典劇集，Bobby坦言現在的心態與以往有別。「以前動輒40幾點（收視），依家最多都係20幾點，很多觀眾都係坐車、坐港鐵時上網翻睇，多過在電視機前煲劇，所以我寧願要口碑！」在電視圈飽經風浪的Bobby，心態上亦能與時並進，難怪這位「福將」可以長做長有！
勸勉同業要自強
現時無綫有四綫劇集，七點第一檔已被內地劇攻佔，Bobby認同時移世易，本地藝人必須自強。「我哋某程度上比以前遜色，內地各方面包括投資、特技也比我哋強，香港演員北上發展亦唔夠人哋爭，對方會先考慮內地演員，因此大家要多與內地交流，唔好封鎖自己！」他語重心長道。
撰文︰梁紹明
攝影︰林良明
編輯：黃寶恩
美術︰顏玉玲
場地︰怡東軒（怡東酒店）
欄名: 人物專題