一年拍6廣告 陳慧琳登廣告天后

陳慧琳（Kelly）昨日出席「TVB周刊第10屆最強人氣品牌大獎2017」，今年拍了六個廣告的Kelly，不但豬籠入水，更獲頒「最強人氣廣告天后」大獎。至於「最強人氣廣告天王」則由曾志偉奪得。

問到Kelly聖誕節會否跟家人出埠？她說︰「應該唔會，會留喺香港，香港都好好玩！去外地玩最慘，又要諗去邊又要Book。」她表示會帶囝囝與同學仔一起去主題公園，因園內的聖誕節氣氛濃厚。另外，Kelly透露明年將會出新碟︰「因為今年趕唔切，我仲要拍四至五個MV。」會否出席即將舉行的各大音樂頒獎禮？她說︰「佢哋有自己嘅制度，我應該唔會去。」

志偉年年減酬勞

同場的曾志偉今年拍攝了四、五個廣告，他表示跟香港老字號品牌合作，更笑言年年減酬勞。「不過我就算無收錢都會照拍，因為大家合作咁多年，品牌每逢八月就會鋪天蓋地賣我嘅廣告，仲搵勻我全家去拍。佢哋仲經常贊助好多慈善活動。」

撰文︰李潔盈

編輯︰林梓添

美術︰梁政敏